Arrasate Herri eskolak hainbat ekintza, hamargarren urteurrenaren harira

San Andres auzoko jaien barruan, Arrasate Herri Eskolako guraso elkarteak salda eta txistorra banatu zuen zapatuan, Bedoñabe eskolaren patioan. Adierazi dutenez, gurasoek ordu eta erdi eman zuten jo ta su zerbitzen eta ordu erdian dena bukatuta zegoen. Ekintza eskolaren hamargarren urteurrenaren harira antolatu zuten eta zapatu honetan, hilak 12, errepikatuko dute Musakolako jaiekin bat eginez.  Gainera, maiatzaren 10ean, osteguna, urteurreneko lip dubaren azken eszenak grabatuko dituzte Erdiko kalean eta Herriko plazan, 15:00etatik 16:30era bitartean. Hurrengo ekintza ekainaren 2an izango da; Laubide eta Biteri plaza hartuko dituen jai erraldoia, hain justu.