Arrasate Institutuko B taldeak estreinatu du Amaia antzokiko oholtza XXII. Antzerki Jardunaldietan, Dena izango da izan behar duen bezala lanarekin. Arizmendiko Gaztelupe B taldearen txanda izan da ostean; Gaixo obra taularatu dute. Eta goiza ixteko, 6. maila bukatu dut estreinatu dute Arizmendiko Almen B taldeak.
Herri Eskolako eta Arizmendi-Almeneko LMHko 5. mailako ikasleak, Almeneko LMHko 4. mailakoak eta Almeneko DBHko 1. mailakoak izan dira ikusleak –200 neska-mutiko guztira– eta primeran pasatu dute: eserlekuan "dantza" eginez eta txaloak joz agurtu dituzte antzezleak eta identifikatuta sentitu dira, bereziki, 6. maila bukatu dut antzezlaneko hainbat pasarterekin: lehen eskola eguna, atseden orduko haserreak, azterketa garaiak edota gimnasia orduko gorabeherak.
Arratsaldean gehiago
Gaur bertan, eguaztena, 14:45ean hasita, berriz eskainiko dituzte hiru antzezlanak, baina beste ikusle batzuentzat: Arizmendiko Gazteluondo, Arimazubi eta Santa Teresako LMHko 5. mailako, Gazteluondoko LMHko 4. mailako eta Gaztelupeko DBHko 1. mailako ikasleentzat.
Egubakoitzeko antzezpenak
Etzirako, barikua, beste emanaldi batzuk iragarri dituzte, toki eta ordu berean.
- Institutua A taldea: Urkuluetako Bainuetxea. Ikusleak: Herri Eskolakoak.
- Arizmendiko Almen A taldea: Maritxu nora zoaz. Ikusleak: Almeneko eta Herriko Eskolako LMHko 4. mailakoak.
- Arizmendiko Gaztelupe A taldea: Hollywoodeko izarra. Ikusleak: Arrasate Institutuko DBHko 1. mailakoak.