Udala auzoko Nebera baserrikoa sortzez, iazko martxoaren 19an hil zen Hilario Uzarraga Astola, bizitza luze askoa izan eta gero, 101 urterekin zendu zen-eta.
Testamentu bakarra eginda hil zen, eta testamentu horren onuradun Iturbide egoitza izendatu zuen; izan ere, ez zituen alperrik bere bizitzako azkeneko 27 urteak bertan eman, Iturbide egoitza zabaldu zenetik hantxe bizi izan zen-eta, 1985. urtetik, hain zuzen ere.
"Oso irratizalea zen, Loiola irratia gustatzen zitzaion; musika klasikoa ere bai, eta oso futbol-zalea zen, Barçakoa bete-betean. Bere gelan egiten zuen bizitza, intimitatea oso gustuko zuen-eta, baina oso jatorra eta zintzoa zen langileekin, beti eskerrak ematen zebilen", kontatu dute Iturbide egoitzatik.
Bada orain utzi die eskerrik beroenak horrenbeste urtean bera zaintzen ibili diren Iturbideko langileei: 18.234 euro esker on. Duda barik, egoitzako langileek ondo zaindu duten seinale.