Gaur hasi eta hilaren 11ra arte Alemaniako Karlsruhe azokan izango ditu ikusgai Iñigo Arregik bere lanak. Hiru eskultura eta 6 erliebe jarriko ditu ikusgai Victor Lope arte-merkatariaren erakusmahaian.
Ekainean, Parisen
Arrasatearra ez da Alemanian izango, izan ere ekainean Parisen egingo duen erakusketa batekin buru-belarri dabil lanean. Lubre (Louvre) ondoan dagoen Hip Galerie D'art galerian zabalduko du erakusketa Arregik maiatzaren 29an eta ekainaren 25era arte egongo dira lanak ikusgai.
Material berria prestatzen dabil: plastikoa eta metakrilatoa erabiliko ditu lanetan, eta kolorea ere sartuko du. Oraindik ez dago ziur nola geratuko diren lanak. Asmoa da pieza handiak eramatea. Artelan berriek orain arte egin duenarekin lotura dutela azaldu du.
Durangon du erakusketa orain
Arrasatearraren lana ezagutzeko, baina, ez dago zertan kanpora joan beharrik. Joan zen astean Durangoko museoan zabaldu zuen erakusketa Arregik. 10 eskultura eta 15 erliebe jarri ditu ikusgai. Hilaren 30era arte egongo da zabalik.