Goizeko kafea hartu dugu Arrasateko Buenuena tabernan, ordu erdi barru Loiurako bidea hartu duten Joseba, Txisko eta Juanekin –argazkirako tabernako Agustintxo ere animatu da, nahiz eta ez den Manchesterrera joango. Ilusioz daude bidaia hasteko, 12:00etan hegazkina hartu eta 14:00etarako Manchesterren egon nahi dute. Hori bai, zalantza dute noiz itzuliko diren: "Ez dugu lo egiteko tokirik hartu. Hasiera batean 03:00etan hartu behar genuen itzulerako hegazkina, baina antza 08:00etan izango dugu hegazkin hori, atzerapenak egon direlako. Hori, baina, gutxienekoa da". Kafe askoko eguna izango da gaurkoa: "Beno, kafe askokoa baino garagardo askokoa... [Barre]".
Athleticek partidu garrantzitsua jokatuko du gaur, Old Trafford moduko zelai handi batean: "Emaitza on baten bila goaz hara, zergatik ez? Ligako talde handien kontra maila ona erakutsi du Athleticek, eta Europako talde handien kontra gauza bera egin dezakegula uste dugu".
"Kontrarioa zein zen jakin, eta berehala bidaia prestatu genuen"
Halaxe onartu digu Josebak, Athleticek Manchesterren jokatu behar zuela jakin zuten momentuan bertan hartu zutela hegaldia: "Halako momentuak gozatu egin behar dira, bizi egin behar dira. Manchesterren asmoa da Arrasateko beste zale batzuekin elkartzea, jende mordoa joan da-eta"