Takarraran proba ez da gogorra, azkarrago edo erritmo lasaiagoan, edonork egiteko moduko proba da, ibilbidea ez delako hiru kilometrotara iristen –2.820 metro Arrasateko erdialdeko kaleetan. Hala, Arrasateko Udalaren helburua ez da kirol hitzordu lehiakor bat antolatzea, eta bai emakumezkoak kirol jarduera egitera animatzea, "Emakumeei espazio publikoak okupatzeko eta, bide batez, kirola egiteko aukera zabaltzea". Hala, Takarraran lasterketaren ezaugarri dira urtero izaten den giro alaia eta errebindikaziorako ematen duen aukera. Lasterketa hau antolatzen laguntzen dute, besteak beste, kirol elkarteek eta Emakume Txokoko laguntzaileek.
Prestakuntza plan eta guzti
Aurtengo edizioa martxoaren 10ean egingo dute, eta bi aste hauetarako prestakuntza plan txiki bat ere egin dute antolatzaileek; urtero proposatzen dute plan hori betetzea, hitzorduaz ahalik eta egoera onenean gozatu ahal izateko. Otsailaren 27tik lasterketa bera hasi arteko plan zehatza da, egun bakoitzean zer egitea komeni den zehazten duena eta luzaketak zelan egin behar diren ere azaltzen duena. Era berean, lasterketa egin ostean ere kirola egitera animatzen ditu plan honek.