Hirugarren urtea da aurtengoa sardina SUDCeko kideek egiten dutena. Hainbat urtetan zehar Crisanto Margusinok egin izan zuen sardina eta hari lekukoa hartzeko elkartu ziren Altzelai, Albes eta Sanzberro: "Ez da lan zaila, ez da teknikoegia, baina ordu batzuk sartzea eskatzen du. Egurrezkoa da gehienbat eta barrutik periodiko ugari ditu, 500 bat ale bai. Eta detaile moduan begietan linterna txiki batzuk sartzen dizkiogu gauean ikusgarriagoa izan dadin". Pisu handia hartuko du beraz, baina 12 lagunen artean eramango dutenez ez du arazo handirik suposatzen.
Erretzera kondenatua
Martitzenean helduko zaio eguna sardinari. Egitarauan ez dago nobedade handirik: SUDCekoek Alkartu elkarte gastronomikoan afaldu ostean Nafarroa etorbidera joango dira sardina jaso eta herrian zehar desfilea egiteko. Azkenik, gauerdi aldera Herriko plazara eramango dute, herri osoaren aurrean sardina erre eta Aratusteak 2013ra arte agurtzeko.