Eraikinok bota, hondakinak erretiratu eta lurra garbitzeko prozesua bi hilabetez luzatuko da. Trapagarango Lezama enpresak dihardu lanean. "Eraikina polita izan arren, barrutik egur guztia ustelduta dauka eta hori mantentzea edo berritzea lan eta kostu handia litzateke", azaldu du obra buruak.
Gaixo pentsiodun partikularrak zaintzeko eraiki zuten Jesusen Bihotz Sakratuaren pabilioia 1.900. urtean. Urte hartan Elezgarai, Ugalde eta Errotaetxe baserriak erosi ziren, zenbait lur sailekin batera. Honela, ospitaleak bere instalakuntzak zabaltzeko aukera izango zuen edo bestela, baserri hauek zeuzkaten nekazaritza eta abelzaintza baliabideak erabili ahal izango zituen lekaimeen eta gaixoen beharrei aurre egiteko, eta urte berean eraiki zuten Bihotz Sakratua. Egonaldi Ertainen Unitate moduan erabili izan dute urtetan.