Jaietako txupinazoaren ostean, Toka lehiaketaren hasi ziren jaiak; 12 bat lagun elkartu ziren. Gero, bertso afaria izan zen Jentil-Ola elkartean. Jokin Labaienek azken orduan ezin izan zuen agertu eta haren ordez Urko Egaña aritu zen Manex Agirre aramaioarrarekin batera. 60 lagun elkartu ziren afarian: "Bertsolariak oso ondo aritu ziren eta giro ederra jarri zuten elkartean", dio Barrenetxeak.
Patata tortilla lehiaketa
Zapatu eguerdian lehenengoz egin zuten patata-tortilla lehiaketa. Zazpi lagun elkartu ziren eta auzotarrez osatutako epaimahaiak lan zaila izan zuen onena aukeratzen. Adar jotzerako uneak ez ziren falta izan, Barrenetxearen arabera: "Pikea izan zen. Batzuek esaten zuten aurkeztutako tortilla batzuk amak edota emazteak egina zirela eta horrek ez zuela balio..."
Arratsaldean auzotarrak kantuan irten ziren Santa Ageda bezpera ospatzeko.
Amaitzeko, luncha
Gaur, auzoko zaindariaren aldeko mezaren ostean luncha egin dute elkartean jaiak borobiltzeko. Gero eta gutxiago falta datorren urterako...