Ze hebururekin sortu da Gorripidea?
Zutik desegin egin da eta Gorripidea, erakunde independente moduan, Euskal Herriko eremuan sortu da, gaur egungo eredu ekonomiko eta sozialaren eraldaketa erradikala sustatzeko helburuarekin.
Nortzuek osatzen duzue Gorripidea?
Lehenago Zutik-en geunden kideak pasatu gara Gorripideara, baina ez guztiak. Arrasaten, esaterako, gehienok gaude, ia jende bera. Bizkaian jende gazteagoa eta gehiago ikusten da.
Zuen ildo nagusiak zein dira?
Ez dira asko aldatuko Zutik-ekoetatik. Euskal Herrian espazio politiko berria sortu da; gu beti gizarte mugimenduetan egon garenez, hori testuinguru horretan nola uztartu lantzen dihardugu; feminismoa, internaziolaismoa, ekologismoa, subiranotasuna…
Oinarriak finkatu dituzue?
Aurreko zapatuan egindako lehenengo batzarrean, nola funtzionatuko dugun erabaki genuen. Horrekin batera, euskal ezkerraren gainean ere eztabaidatu genuen; hain justu, non kokatuko garen da aurrerantzean landuko duguna.
Zer ezberdin eskainiko du Gorripideak?
Eremu sozialetan gogor egitea eta beste alderdi batzuekin aliantzak egitea. Alderdi txikia izan arren, bai ikusten dugu gauden krisiaren aurrean irteera bakarra dela euskal ezkerra batzea.
Hauteskundeetan egongo zarete?
Oraingoz, ez dugu halakorik eztabaidatu. Zutik talde txikia izanda ere, instituzio lokaletan bakarrik izan du ordezkaritza, eta pentsatzen dugu oraingoz ez daukagula instituzioetan egoteko energia hori.