Santa Ageda bezperako ospakizuna antolatzeko bilerara 40 lagun elkartu ziren, Sagastaren arabera: "Bilerara ez da jende guztia agertzen eta aurten gainera, zapatua denez, aurrekoetan lanagatik-eta agertzen ez zen jende gaztea agertuko dela espero dugu".
08:00etako meza entzun ostean bi taldetan banatuko dira: lehen taldea erdigunetik Eroski aldera joango da eta Aranguren baserriko ohiko geldialdiaz gain, aurten Artzubi, Kataide eta Zabaleta baserrietara ere joango dira, besteak beste. Gero, Zigarrola aldean arituko dira kantuan. Beste taldea, berriz, Bedoña aldera joango da eta Bedoña auzoko baserrietan abestu ostean, San Andres auzoan jarraituko dute kantuan.
14:00etan, udaletxeko eskaileretan
Bi taldeak udaletxean elkartuko dira, 14:00etan. Han udal ordezkarien aurrean abestuko dute eta gero Leitze elkarte gastronomikora joango dira bazkaltzera. Sagastak adierazi duenez, 70 bat lagunendako baba-jana prestatu dute.
Jasotakoa, Caritasera
Bazkalostean 19:00etan Portaloian arituko dira kantuan eta kantaldiekin amaitzeko 21:00ak aldera plazan bilduko dira. Egun osoan zehar jasotako dirua, urtero legez, Caritasera bidaliko dute.