Oholtza gainera bost aktore eta musikari igoko dira. Eskainiko dutena esketxak, abestiak eta zenbakiak izango dira, azken finean umorez betetako uneak.
Denbora izango da gaia. "Denbora errealean" izango dela antzezlana azaldu dute; hau da, hamar segundo, ehun egun eta mila urte iraungo duen antzezlana izango da. Izan ere, ikuskizunak denboran zehar ibilaldia egingo du. Alde batetik, munduaren hasiera irudikatuko dute Big Bang Band musika taldearekin. Eta, denboraren bakarrizketa ere egingo dute. Antzezlanak iraungo duen ordu eta erdian denboraren bankaria eta Minutti jaun mafiosoa ezagutuko ditugu, besteak beste.
Zuzeneko musika
Ahotsa, gitarra, perkusioa, haizea, sokak... era guztietako musika instrumentuak erabiliko dituzte antzezlanean, zuzenean. Musikari dagokionez, hainbat musika estilo landuko dituzte: jazz, flamenkoa, hip-hopa, pasodoblea... Musika zuzenean sortuko dute oholtza gainean.
Antzezlaneko esketxak erritmo bizian antolatu dituzte, eta modu egokian lotu dituzte bata bestearen atzetik, haria ez galtzeko. Umore kritikoa eta garratza da taldearen ezaugarria.