Iheskiderekin gaztetxea lepo betez agurtu du urtea Kooltur Ostegunak ekimenak

Kooltur Ostegunak ekimenaren barruan, Elorrioko Iheskide taldeak bete egin zuen atzo Arrasateko gaztetxea. Gaizka Jareño 'Tronpi' agertokian zela, hasierako formazioarekin taularatu ziren elorriarrak. Ohikoa duten punk rock indartsua eskaini zuten; nahiko hotz hasi arren ondo berotu ziren amaierarako. Errepertorioari dagokionez, estilo horretako musika zaleendako ereserkiak: 'Ez etsi, eutsi', 'Aurkitu zaitut' eta 'Iheskide', besteak beste. Bertsioen artean aipatzekoa Vomitoren 'Mirando el abismo'. Ordu eta erdi pasatxo iraun zuen kontzertuak: distortsioa, indarra eta izerdia nagusi. Azken hileetan zuzeneko askotxo eman ostean, disko berria grabatzen jarriko dira orain, Haritz Harregirekin.