Aurrerapen agiri horretan ez dira proposamen zehatzak jasoko. Omer Arregi Hirigintza zinegotziaren arabera, eztabaida sortzeko agiria aurkeztea da helburua, alternatiba ezberdinak jasoko dituena: "Gaur egunean indarrean dagoen Egitamu Orokorra eztabaidarako zero puntua izango da".
Agiria onartzeko prozedura
Herritarren proposamenak jaso ostean Plan Orokorra idazteko oinarrizko irizpide eta helburuak zehaztuko dira, gero agiri hori prestatu eta jendaurrean erakutsiko dute hilabete batez, eta eskumenak dituzten bestelako administrazioei ere jakinaraziko zaie.
Erakusketako emaitzak jasoko dira eta behin behinekoz onartuko da agiria, dagozkion aldaketekin. Aldaketok egiturazko antolamenduaren funtsa aldatzen badute Udalak hasierako onespena eman beharko dio agiriari eta jendaurreko izapidea irekiko du berriz, beste behin onartu aurretik.
Horren ostean Udalak agiria EAEko Lurraldearen Antolamendurako batzordeari igorriko dio eta batzorde horren txostena loteslea izango da lurralde antolamenduko tresnei, eta Udalaz harago dauden proiektuei. Hiru hilabete izango du batzorde horrek txostena egiteko. Eta orduan, aldaketa guztiak egin ostean, Udalak behin betiko Plan Orokorra onartuko du.
Udalak hainbat lekutan eragina izan dezaketen proiektuak erakutsiko ditu herritarren aurrean. 21 proposamen dira guztira eta aurkezpenean adierazi dutenez, plana onartu eta indarrean jartzeko hainbat urte pasa daitezke.