Gaur amaituko da Arrasateko Nazioarteko Akordeoi lehiaketa. 20:00etan izango da azken ekitaldia Amaia antzokian. Baina, aurretik, gaur, goizean goizetik, azken saioa jokatuko da. 09:00etatik aurrera, epai-mahaiak aukeratutako 9 akordeoi jotzaile onenak lehiatuko dira. 16 lagunek hasi zuten lehiaketa zapatuan. 15:00etan hasiko da arratsaldeko saioa. Baina, gaurko amaiera ekitaldian, iluntzekoan, sariak banatzeaz gain, Ugarte anaiak izango dira oholtza gainean, txalapartarekin, eta Xuira aire-zirkuaren akrobazia ikusgarriak.
Zapatuan hasi zen txapelketa. Gipuzkoakoan, bi arrasatearrek urrezko eta zilarrezko domina jaso zuten. Bestean, Estatu mailakoan, Aragoi, Asturias, Kantabria, Gaztela eta Leon, Katalunia, Euskadi, Galizia, Murtzia eta Nafarroako bederatzi akordeoi jotzaile aritu ziren atzo. Gaur jasoko dituzte sariak.
Horretaz gain, atzo, Ivan Sverkok, Arrasate Hiria 2010eko irabazleak, emanaldia eskaini zuen.
Gaur, sari banaketa ekitaldiaren ostean, gauerditik hasita, Kajoi tabernan kafe-kontzertua izango da.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.