Diskoa argitaratzearekin batera, zuzeneko emanaldiak hasiko dituzte, diskoa aurkezteko. Otsailaren 10ean, esaterako, Arrasaten izango dira.
Zuzeneko emanaldiak
Hemen, oraingoz ziurtatuta dituzten kontzertu zerrenda osoa:
- Abenduak 3 zapatua: Durango, Plateruena.
- Abenduak 10 zapatua: Hondarribia, Psilocybe.
- Abenduak 30 egubakoitza: Ondarroa, Kafe antzokia.
- Urtarrilak 14 zapatua: Bermeo, Kafe antzokia.
- Urtarrilak 21 zapatua: Iruña, Gora Iruña aretoa.
- Otsailak 10 egubakoitza: Arrasate, Gaztetxea.
- Otsailak 24 egubakoitza: Gasteiz, Jimmy jazz.
- Martxoak 17 zapatua: Etxarri, Gaztetxea.
Doinu indartsua
Governorsen bereizgarri handienetakoa da doinu indartsu eta itsaskorren arteko eremu ia ezinezkoari eustea, eta lan honetan muturrak are eta gehiago aldentzen badira ere, lemari tinko eutsi diote iparra inola ere galdu gabe.
Taldekideen iraganeko heavy-rocka melodien atzean burrunbaka zelatan ageri da zenbait kantutan eta nagusitu egiten da Beldar itsua-n; Eskandinaviako punk-rock bizienarekin Mikel Laboari omenaldi partikularra egin (Mikel Snake) eta aurrera egiteko animoak ematen dizkigute (Igerian); Joserra Senperenaren laguntzarekin, Frenetikodrome-n ia oharkabean hasitako ildo dantzagarria Bertigo!!-n sintetizadore eta guzti garatu dute.
Abestea/espresatzea ezin hobeto deskribatzen duen Larru azalean kantan rocka eta elektronika ezkondu dituzte; eta Bik MacFarlanek lagunduta, Bobby Sandsen figura emozioz eta intentsitatez gainezka egiten duen pieza pop-rockeroarekin jantzi dute, besteak beste.
Elementu anitza
Zera irakur daiteke Iker Barandiaranek idatzitako promozio orrian:
"Collage jarri diote izenburua diskoari eta collagea da elementu anitzak batasuna duen osotasunean batzen dituen teknika artistikoa; batzuetan arriskutsua izan daiteke, baina are eta arrisku handiagoa hartu emaitza are eta aberatsagoa izan daiteke. Arrasateko taldearen hirugarren lanak asko du horretatik".