"Langabeziari aurre egiteko borroka lehentasunezkoa" da Eusko Jaurlaritzarendako. Horregatik, eskuetan dituen "baliabide guztiak" baliatu nahi ditu langabezian daudenak lan merkatura itzultzeko.
Hasierako asmoa zen 2012ko urtarrilaren 2an hastea goiz eta arratsaldeko ordutegiarekin, baina dena aurreratzea erabaki du Jaurlaritzak eta, honenbestez, gaurtik aurrera goizeko 9etatik 20:00ak arte zabalik izango dira Lanbideren bulego guztiak.
Langabeei jarraipena eta laguntza
Arratsaldez, langabeei eskainiko zaie zerbitzua, aldez aurretik zita eskatuta. Helburua da Lanbideko orientatzaileek jarraipena egitea lan barik daudenei, ahalik eta azkarren lan merkatura inkorpora daitezen.
Gema Zabaleta Lan eta Gizarte Zerbitzuetako sailburuak adierazi du baliabideak optimizatu nahi dituztela Lanbideren bulegoak arratsaldez ere zabalduta eta, azpimarratu du, Lanbide "Espainiako lehen Enplegu Zerbitzua dela langabeei orientazioa eta jarraipena eskaintzen diena".