Kalitatezko kafe goxo bat lortzeko faktore asko hartu behar dira kontuan eta horiek guztiak azaldu zituen Marisa Baquek martitzenean Arrasateko Kulturaten; kafea dastatzen eta aztertzen erakutsi zien Jokin Zaitegi aretora joandakoei.
Ardo dastatzearen antzekoa
Baquek erakutsi zigun ardo dastatzea eta kafe dastatzea oso antzekoak direla. "Lehenengo, kolorea aztertzen da; ondoren, usaimenaren bitartez lurrinak aztertzen dira; dastamenera pasatzen gara gero, kafeak duen garraztasuna, dentsitatea eta ahoan uzten digun zaporea aztertzen ditugu".
Espainiako kafe dastatzaile onena parean edukita, nola ez, kafe on bat prestatzeko aholkuak eskatu genizkion. "Garrantzitsua da kafe freskoa eta kalitatezkoa topatzea; hau da, duela gutxi txigortutakoa izatea, txigortu ondoren kafeak propietateak galtzen dituelako eta herdoiltzen hasten delako. Eta garrantzitsua da kafea ondo mantentzea; nire aholkua da izozkailuan sartzea. Kafearen kalitatea bermatuta daukagunean beste gakoetako bat uraren tenperatura izango da: 92-98 graduan egon behar du, beroago badago kafea erre egingo delako. Amaitzeko, kopurua ere zaindu behar dugu, kafe gehiago botatzeak ez duelako esan nahi zapore hobea lortuko dugunik. Nik beti esaten dut 150 mililitroko –kikara bat kafe– 9 gramo kafe bota behar ditugula".
Euskaldunak, kafesnezaleak
Baquek esan zuen Euskal Herrian kafe arabikoak kontsumitzen direla gehien eta, orokorrean, nahiko kalitate oneko kafea dagoela hemen. Dena dela, azaldu zuen kafezaleak baino gehiago, kafesnezaleak garela euskaldunak.