Portaloia elkarteak antolatutako ekimena da Herrixa Dantzan eta helburua da herritarrak elkarrekin dantzan ipini eta gozatzea. Egubakoitzean behintzat lortu zuten helburua.
Patxi Montero ibili zen gidari lanetan eta azalpenak ematen; saioaren amaieran pozik azaldu zen egindako lanarekin: "Kontuan izanda lehenengo saioa izan dela eta zubi baten atarian geundela, dantzan berrogeitik gora lagun biltzea marka ona dela uste dugu. Antolatzaileok gustura gaude jasotako erantzunarekin eta dantzaldiko giroarekin".
Ekimena finkatzeko asmoa
Deialdiak izan zuen arrakasta ikusita Herrixa Dantzan egitasmoa finkatzea da asmoa. Hori horrela dantza saioak egingo dituzte hileko azken egubakoitzetan. Abendukoa Gabonen bueltan dela-eta non izango den zehazteko dago oraindik.