Udalak azken Tokiko Gobernu batzarrean landu zuen gaia, eta Iraia Sola Gazteria zinegotziak egoitza zein egoeratan dagoen azaldu digu: "Azken ukituak falta dira. Arotza mahaiak prestatzen dabil eta soinu ekipoa egokitzea falta da, besteak beste; azken erremateak hil honetan amaituko dira".
Gero, Solak emandako azalpenen arabera, hilaren 30ean egin dute hitzordua gaztetxoekin batera egoitza altzariz janzten eta gunea antolatzen hasteko: "Egoitzak asteburutako hutsunea beteko du eta auzoetako gaztetxoak erdigunera erakartzea da asmoa". Izan ere, asteburuetan bakarrik egongo da zabalik, egubakoitzetik domekara bitartean.
'Zuk proposatu, zuk antolatu'
Txatxilipurdik eta Udaleko Gazteria Sailak jakinarazi dutenez, asmoa da gaztetxoen artean "jarrera aktiboa, dinamikoa eta parte hartzailea" sustatzea. Hala, Zuk proposatu, zuk antolatu izango da ikasturte berriko leloetako bat. Halaxe azaldu digu Lander Juaristi Txatxilipurdiko Gazte Saileko arduradunak: "Ekintzak gaztetxoen beharren arabera antolatzen jarraituko dugu, jarrera aktiboa izan dezatela lortzea oso garrantzitsua da-eta guretako".
Erdigune egoitzan dinamika bera izango da: "Azken finean, gazte txokoetako filosofia egoitza berrira eramango dugu", dio Juaristik. Ikasturte hasierari begira ez dute ekintza berezirik antolatuko, zentro bakoitzak bere kabuz irekiko ditu ateak.
Ia 300.000 euroko kostua
Gaztegunea egiteko aurrekontua izan da 296.035 eurokoa. Udalak gastuei aurre egiteko Aldundiaren eta Jaurlaritzaren dirulaguntzak jaso zituen. Lokal handia da, erabilgarriak diren 250 metro koadro izango ditu-eta.
Bi gune izango ditu: lehena, Topagunea izena jarri diotena, erabilera anitzerako lekua izango da– formatu txikiko denetariko ikuskizunendako oholtza txiki bat dago, esaterako– eta gune aktiboa, berriz, ping-pong, mahai-futbol eta antzeko jolasendako egokitu dute.