Badator Merkemerkauaren seigarren edizioa. Otsaileko bosgarren edizioa arrakastatsuaren ostean, lehenengoz antolatu dute Ibai-Artekoek udaberri-udako azoka: "Udaberri-udako azokan merkatariak kalera aterako dira aurreko edizioko arrakasta errepikatzeko ilusioarekin", adierazi dute Ibai-Artekoek prentsa ohar baten bidez. Aurreko edizioetan moduan, saltoki gehienek kalitatezko produktuak prezio murriztuetan aterako dituzte euren erakusleihoetara: Olarte, Otalora Lizentziaduna, Iturriotz, Garibai, Iturriotz eta Zerkaosteta kaleetan.
Nobedadez jositako edizioa
Erdialdetik urrun dauden saltokiak edota euren produktuak erakusleiho aurrean jartzeko aukera ez dutenek, aldiz, Biteri plazan kokatutako karpetara eramango dute azoka. Dena den, seigarren edizio honek berritasun gehiago ere baditu. Izan ere, Ibai-Arteko elkartekide diren saltokietan azokako mapak jarri dituzte bezeroen eskuetara. Zertarako? Honela azaldu dute: "Parte hartzaileak zeintzuk diren erakusteaz gain hauen kokapena ere jakinarazteko".
Kalitatea, merke-merke
Hala, zapatuko Udaberri-udako Merkemerkaura gerturatzen direnek %70 eta %80ko deskontuak aurkitu ahal izango dituzte produktu ezberdinetan: arropa, haur arropa, lentzeria, mertzeria, osagarriak, oinetako… Gainera, eguna girotzeko, kalean zein Biteriko karpetan musika jarriko dute.