Abaroako bazkide eta oro har Arrasateko erretiratuendako planik ez da faltako. Tai Chi ikastaroan parte hartu gura dutenek astelehenetik eguenera eman beharko dute izena Etxaluzen 18:00etatik 19:30era, hots, bulego ordutegian.
Sukaldea eta zinema, zabalik
Eguaztenetik aurrera, hilak 14, sukaldea irekiko dutela iragarri du erretiratu elkarteak. Sukaldea erabili gura dutenek nbulego ordutegian eman beharko dute izena. Gainera, zinema emanaldiak hasiko dira: irailetik aurrera astero egongo dira pelikulak eta filmaren izenburua, eguna eta ordua astero jakinaraziko dira Etxaluzeko iragarkien taulan.
Gernikara txangoa
Irailaren 22an, bestalde, Bizkai aldera irteera egingo dute. Gernikako erretiratu-etxea, junten etxea eta museoa bisitatuko dituzte. Laka-erdi sagardotegian bazkalduko dute eta bueltan Ondarroan egingo dute geldialdia. Izena emateko eguna da irailaren 15a, 10:30etik aurrera. Autobusa 27 euro ordaindu beharko da eta bi autobus jarriko dituztela jakinarazi dute. Txartelak hilaren 20an banatuko dira, 11:00etan.