Adituek diote inor ez dutela hotz uzten Napoka Iriaren zuzenekoek; Narbaizaren ahots indartsua eta gitarra soinuak besterik ez dituzte erabiltzen aretoa betetzeko.
Bergaran grabatutako diskoa
2005ean grabatu zuten euren lehenengo lana Narbaizak eta Mujikak. 2008an hiru kantuz osatutako bigarren maketa kaleratu zuten. Orain eskaintzen dabiltzan lana aurten zuzenean grabatutakoa da. Hain zuzen, Bergarako Zabalotegi aretoan grabatu zuten diskoa urte hasieran.
Aste bukaera batean bi kontzertu eskaini zituzten, kantu zahar, berri eta bertsioak nahastuz. Zabalotegin eskainitako hamar abesti aukeratu dituzte Lehertarazi edifizioak lana osatzeko. Gitarra elektrikoa, akustikoa eta ahotsa besterik ez dute erabili diskoan.
Grabazioak egin ostean Legarre estudioan txukundu zuten diskoa, Ander Barriusoren laguntzarekin. Diskoaren diseinu lanak Mujikak berak egin ditu.
Zapatuan, Litoral
Kulturate akustikoak zikloaren barruan bigarren emanaldia Litoral taldeak eskainiko du bihar zapatua, 20:00etan. Pau Roca musikaria da Litoral taldeko burua; gainerako kideak eskarmentu handiko musikari Ivan Cuevas, Edu Baos, Manu Moreno, Guillaine Goosse eta Pablo Magariños dira.
Folk doinuak sortzen dituzte, eta katalana eta frantsesa erabiltzen dute euren abestien letretan. Musika sortu eta zuzenean jotzeko askatasuna bilatzen du Litoral taldeak, mugarik eta hesirik gabeko filosofia jarraituz.
Arrasateko Udalak antolatutako kontzertu zikloa da.