Edonolako bizikletak
Birzikleta azokarako egoera onean dagoen edozein material jasoko dute: bizikletak –mendikoak, paseokoak, errepidekoak, haurrena, trizikloa, patin edo patineteak– kaskoa, belozimetroa, gurpilak, eskularruak eta maillotak, besteak beste.
Materiala batuko dute Udal azokan etzi, zapatua, 11:00etatik 13:00etara; eta, hilaren 13 eta 15ean, martitzena eta eguena, 11:00etatik 13:00etara eta 17:00etatik 19:00etara.
Prezioa jabeak jarriko du
Azokarako eramaten den materialari jabeak jarri beharko dio prezioa. Saltzen ez den eta saldutakoaren zenbatekoa jabeari itzuliko zaio irailaren 22an, eguena, 17:00etatik 19:00etara Udal azokan.
Birzikleta azoka hilaren 17an egingo dute, zapatua, 11:00etatik 15:00etara Seber Altube plazan.
Segway zirkuitua
Hilaren 17an, birzikleta azokaz gain Segway eta Trikke zirkuitua ere egingo dute. Biteri plazan izango da, 11:00etatik 14:00etara. Horrez gain, 11:00etatik 15:00etara emisio txikiko ibilgailuen erakusketa egongo da Biteri plazan: auto hibrido eta elektrikoak, paseoko bizikletak, elektrikoak...
Autobus zerbitzua doan
Irailaren 16tik 22ra hiri autobus zerbitzua doan izango da. Beste urte batzuetan egon izan diren arazoak ekiditeko, adin txikikoek nagusi baten laguntzarekin erabili ahal izango dute autobus zerbitzua doan.