Uztailean zinema Monterron parkera eramango zutela aprobetxatuz, Amaiako sarrerako eremu urbanoa berritzen hasi ziren uztailaren 11n. Zertarako? Bada, antzokia ageriago egon dadin eta irisgarritasuna hobetzeko. Lanek bi hilabete eta erdi irautea aurreikusi zuen Udalak baina Obra Sailak adierazi berri duenez, irail amaierarako amaitzea espero da.
Eraginik ez kultur eskaintzan
Hala, obrek ez dute Amaia antzokiko kultur eskaintzan eragin zuzenik izango. Izan ere, dagoeneko aterpeko sarrera libratu dute eta ikusleak bertatik sar daitezke. Ikasturte berriko lehen pelikula irailaren 17an botako dute: Woody Allen zuzendari famatuaren Media noche en Paris, hain zuzen (19:30ean eta 22:00etan).
Uarkapeko lanak, amaituta
Bestalde, Obra Sailak jakinarazi du Uarkapeko teilatua iragazgaitzeko lanak amaitu direla: "Azken erremateak falta dira baina obra amaituta dago".