Iaz ere parte hartu zuen aurtengo talde irabazleak baina, jende gaztez osatua, talde nahiko berria da. Eurak izan dira, ordea, asteburuan "egurra" eman dutenak, antolatzaileen esanetan. Ondo ibili da iazko txapelduna –Doble Cero– ere; finalaurrekoetara ailegatu da.
Finala bera moduan, penaltietan erabaki ziren bi finalaurrekoak ere: Doble Cerok eta Gary Cooperrek jokatu zuten lehena (3-3), eta La Kanterak eta Txus Unitedek bigarrena (2-2).
Txapelketako irabazle Gary Cooperrek beste sari bat ere eraman zuen: jokalari onenarena; Imanol del Pozo Delpo izan zen errekonozimendu hori jaso zuen jokalaria.
16 talde
Aste barrurako 11 talde zeuden izena emanda, baina bost gehiago apuntatu ziren gero eta, beraz, 16 taldek parte hartu zuten txapelketan: Semen Up, Txus United, Doble Cero, Gary Cooper, La Kantera, Poli conection, Bixigutarrak, Abokajarro, McAwen Dauen, Lasagabaster, Lahamakun, HLB 108, Dedo Pa Farru, Esfinter de Milar, Aldapa eta Inter Mitente. Talde bakoitzeko 10 lagun inguru, 160 bat guztira –denak mutilak–.
Giro ona
Istilurik, lekuz kanpoko jarrerarik edo sarrera itsusirik ez da izan eta antolatzaileen balorazioa ona da. Soilik 01:00etan hasitako euriak zapuztu zuen zertxobait gaua, lurra labainkor utzita.