Inazio Azkarraga-Urizar alkateak joan den astean jakinarazi zuen Bildu eta Aralar akordio batera heldu direla Udalean batera joateko. Hala, Bilduren 11 zinegotzien botoei Aralarreko Joxe Etxeberriaren botoa batuko zaie aurrerantzean. Hala, batzorde informatzaile baten ardura izango du Etxeberriak.
Hala ere, alkateak gainerako alderdiekin bilerak egin aurretik ez du publiko egin nahi izan batzorde bakoitzeko buruen izena.
Hamaika erabaki garrantzitsu
Plenoan hainbat erabaki hartuko dira, guztiak udal funtzionamenduak behar duen antolaketarekin zerikusia dutenak. Iñigo Garitano udal idazkariak emandako argibideen arabera, bi zati izango ditu plenoak. Batetik, ekainaren 11ko udal eraketa plenotik uztaileko plenora arte alkateak hartu dituen erabakien berri izango du osokoak. Hauek dira erabaki garrantzitsuenak: Tokiko Gobernu Batzarreko kideak eta alkateordeak izendatzea, alkateari legeak ematen dizkion eskuduntzetatik zeintzuk uzten dituen bere esku eta zeintzuk uzten dituen gobernu batzarraren eskuetan. Erabaki hauek erabat aldagarriak dira.
Bestalde, osokoak onartu beharreko erabakiak daude. Besteak beste, batzorde informatzaile iraunkorren kopurua eta horietako arduradun politikoa zehaztea, udal karguen konpentsazio ekonomikoak zehaztea –zein zinegotzik izango duten liberazio ekonomikoa eta zenbatekoa– eta Udala kide den erakundeetako arduradunak izendatzea. Azken horien artean daude, esaterako, Mankomunitatea, Aukea kirol erakundea eta Iturbide egoitza.