Egubakoitzeko kontzertuak kurtsoari amaiera emateko balioko du. Arrasateko musikariak oso motibatuta daude, eta pilak kargatuta etorri dira Alemaniatik.
Gaur egun taldean dauden musikariak eta aurreko 10 urteotan taldekoak izan direnak ere igoko dira taula gainera bihar Monterronen. Egitaraua aldetik azkeneko 10 urteetan jo izan dituzten pieza esanguratsuenak interpretatuko dituzte.
10 urte hauetan Big Band taldeak hiru zuzendari izan ditu: Jose Ramon Elkoro, Iker Olazabal eta Zigor Martinez.
Udazabal 2011 egitaraua
Urtero uda partean Udazabal egitaraua prestatzen du Udalak. Hala, dagoeneko gertu dute uztailean eta abuztuan herrian eskainiko dituzten ekitaldiak.
Musika, antzerkia, dantza... denetariko ekitaldiak izango dira. Gainera, eraikinetatik kalera atera dute aurten ere kultura: hala, Monterron parkean, Herriko Plazan eta Jose Letona plazan izango dira emanaldiak.
Datorren astean Kukai dantza taldeak Karrikan ikuskizuna eskainiko du Herriko Plazan. Ikuskizuna 20:00etan izango da, eta sei dantzarik eta DJ batek parte hartuko dute. Estilo, erregistro eta hizkuntza koreografiko berriak ikusteko aukera paregabea izango da Kukaik Herriko Plazan eskainiko duena. Gainera, euskal ikuskizunik onenaren saria lortu du Karrikan ikuskizunak.