Lehenengoz zabaldu ditu ateak erdiguneko gazteguneak. Oraindik ez da inauguraziorik egin baina protagonistek, hots, etorkizuneko erabiltzaileak izango diren gaztetxoek, izan dute eraikina barrutik bisitatzeko aukera. Gu eurekin batera sartu gara, eta lehen inpresioa eskatu diegu:
Aitor Meltrasek honakoa adierazi du: "Eraikina oso handia eta polita ematen du. Kolorezko kristalak gustatu zaizkit. Jolasteko erabiliko dut; ping-ponga, billarra, futbolina...".
Judith Fernandez de Arroiabek, berriz, modernoa dela azpimarratu du: "Ez du beste gazte txokoen itxurarik. Lagun berriak egiteko aukera egongo dela uste dut, eta aspertuta zaudenean edo eguraldi txarra dagoenean film bat ikusteko edo besterik barik denbora pasatzeko leku ezin hobea da. Etxetik hurbil dugu, lehen auzoetako gazte txokoetara joan behar ginen"
Azkenik, Amets Ormaetxeak uste du jende asko etorriko dela: "Oso leku onean dago eta jende asko etorriko da. Handia da eta aspertuta gaudenean edozein ekintza egiteko aukera ematen digu".
Egoitza ikusi ostean zein erabilera eman pentsatzen aritu dira, begiraleen laguntzaz.