Estricalla taldea Fer Apoa –El Corazón del Sapo, Kuraia, Matxura– eta Kloakao taldeko musikariek osatzen dute. Amorru, abiadura eta tentsio handiko hardcorea egiten dute, sua ere dariona musikan eta hitzetan. Iaz Gimnasia revolucionaria diskoa argitaratu zuten, eta orain dela gutxi Fuegos Olímpicos lana kaleratu dute. Hain zuzen, Arrasaten aurkeztuko dute azken lan hori. Eskola zaharreko hardcorean gaur egun ere biziraun daitekeela erakusten dute behin eta berriz Stricalla taldeko kideek.
Kataluniako Kop
Kataluniako Kop taldeak ere jardungo du kontzertuan. Aspaldiko lagunak dira Arrasateko gaztetxean kataluniarrak. Nekaezina den Juanrak (Speereth...) gidatutako taldea 1998an sortu zen, Speerethen errautsetatik. 2002an, baina, taldea bertan behera geratu zen. 2007an berriro ere bueltatu ziren, indarrak hartuta. Iaz Acció directa lana kaleratu zuten, asmo deklarazio hutsa izan zena.Taldea hardcoretik abiatu bazen ere, gaur egun hurbilago daude metal eta thrashetik soinuetatik.
Taldekideek euren myspace atarian diote: "Uneotan borrokan darraigu, anestesia borrokatuz konformismoaren mugak gainditzeko. Lehen bezain koherente eta proposamen zein protesten parte izanik alternatibak eta elkartasuna sustatuz behin eta berriro".
Indarra eta jarrera erakutsiko dute bi taldeek.