12 eta 17 urte arteko gaztetxoei zuzendutako Erdigunea piztu ekimenaren barruan azken ekintza antolatu dute Udalak eta Txatxilipurdik: urban festa. Hilaren 18an izango da, zapatua. Arratsalde osorako egitarua prestatu dute: mikropatin, skate eta BMX modalitateko bizikleten txapelketa, graffiti lehiaketa eta zuzeneko musika izango dira protagonista. Hitzordua Nafarroa etorbideko parke berrian da, udaltzazingoaren eta Txatxilipurdiren egoitza berriaren ondoan.
16:30ean irekiko da txapelketa ezberdinetan parte hartzeko izenematea eta lehia 17:00etan hasiko da: mikropatinak lehenengo, gero skate-a eta azkenik, BMX modalitateko bizikletak. 19:00etan RPL –Repelencia– taldeak joko du; adin tarte horretan kokatzen den taldea da, eta nagusiki punka egiten dute. Kontzertuaren ostean sari banaketa egingo da (19:30).
Arratsaldean zehar Lexuri Doyague gazte arrasatearrak graffiti bat marraztuko du eta DJ Olatz euskal hardcore eta hip-hop doinuak jarriko ditu.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.