Harreman Gobernuz Kanpoko erakundea hiru helburu nagusi ditu: herri txiroen arazoaren gainean arrasatearrak sentsibilizatzea, erakundeen inplikazioa areagotzea eta arrasatearren diru-laguntza lortzea garapen bidean dauden proiektuei laguntzeko. Proiektu horien artean aurkitzen dira Mozanbikeko Marrupa hiriko azpiegituren plana eta Indiako Ankur herriko eskolaren proiektua.
Egun osoko egitaraua
Honakoa izango da egitaraua: 10:00etan irekiera ekitaldia egingo dute, 12:00etan txikienendako puzgarriak izango dira, 12:30ean Arrasate Musikalen banda txikiaren emanaldia egongo da, 17:30ean Iker Diaz ipuin kontalaria izango da, 18:30ean dantza saioa eta azkenik, 20:30ean Eroski Bidaiak-en eskutik sariaren zozketa.
Bestalde, ekintza eta gune ezberdinak izango dira egun osoan zehar. Postu ezberdunak: bidezko merkataritzaren aldekoa, te dastatzearena, Ankur-eko (India) umezurtegiaren aldeko Ibai-Arteren tonbola, GKE ezberdinen erakusketa, umeendako puzgarriak eta hezkuntzaren aldeko Arizmendiko ikasleek antolatutako elkartasun izaeradun euroa, besteak beste.
Elkartasun izaeradun pintxo-poteoa, ekainaren 2an
Ekainaren 2an, bestalde, Harreman eta Arrasate Bizirik elkarteak elkarlanean antolatu dute elkartasun izaera izango duen pintxo poteoa. Egun horretan etxeko kaxoietan galduta dauden pesetak batzea gura dute antolatzaileek, herri txiroei begira. Pesetekin ez bada, noski, euroekin ere lagundu daiteke. Nola? Bada, txanponak Arrasate Bizirik elkartea osatzen duten tabernetan –Dublin, Hilarion, Hotel Mondragon, Iturriotz, Lorategi, Monte eta Zuk nahi tabernak– jarriko dituzten itsulapikoetan botata.