PSE-EEk Arrasaterako duen programa bost zutabetan oinarritu du Arrietak: ekonomia, kooperazioa, hirigintza jasangarria, elkarbizitza eta azkenik, kultura eta kirola. Hainbat proiektu dituzte esku artean, beti ere Arrasate Debagoieneko hiriburu bihurtzeko helburuz: Arte eszenikoen eskola sortzea –izena pentsatu dute dagoeneko: Mondragon Brain Storm–, geltoki intermodala Eroski ondoan jartzea, erdigunean, San Frantziskoko errotondatik Muxibarrera arteko tartea berrantolatzea eta autoa gutxiago erabiltzeko kontzientzia zabaltzea...
Hainbat proiektu
Horrez gain, honako proposamenak ere egin ditu, besteak beste: lanak esleitzerako orduan, herriko enpresak eta bertako langabeak kontratatzen dituztenak lehenestea; Udaltzaingoaren eta Ertzaintzaren arteko koordinazio egoki baten bitartez, segurtasuna hobetzea; garbitasun ordenantza indarrean jartzea; auzoetan haur-parkeak, beharrezkoa ikusten den tokietan komun publikoak eta bidegorrian iturriak ipintzea; alokairuzko babes ofizialeko etxebizitzak sustatzea; bosgarren edukiontziaren alde egitea; Arrasate Debagoieneko hiriburu izan dadin lan egitea; leku publikoetan kalitatezko wi-fi guneak ezartzea, eguneko 24 orduetarako; edota kirol instalakuntzetan hobekuntzak egiten jarraitzea.
Finantziazioa hobetu, erakunde publikoekin harreman sendotuz
Asmo horiek denek eta gehiagok osatzen dute Arrasateko sozialisten programa eta, egoera ekonomikoa zaila dela onartu arren, erakundeekin berrartu asmo dituzten harremanei esker, errazagoa izango dela esan du Aritz Arrieta alkategaiak: "Azken lau urteotan Arrasate eta Debagoiena Gipzukoako Aldundiaren herri ahaztuak izan dira, eta gurean egin diren proiektu handienak Zapateroren E-plaren eta Jaurlaritzaren Hiriber planari esker egin dira".