Aintzane Ezenarrok adierazi zuen asko dagoela jokoan: "Batetik, PP eta PSE-EEren arteko binomio estrategiak erantzun abertzale bat behar du, Diputazioetan gobernua ez dezaten hartu. Bestetik, bizi dugun krisi ekonomiko honek ezkerreko erantzunak behar ditu eta hori da gure lehentasuna. Horretaz gain, jokoan dago etorkizuneko ezker abertzalea zein oinarritan eraikitzen den. Guk garbi daukagu ezker abertzaleak izan behar duela politikoki eraginkorra eta erantzunak eman behar dituena. Gainera, gaitasuna behar du ezberdinekin adostasunetara iristeko. Ez da nahikoa norberak proposamenak egitea, gero isolatzen badira."
Gaineratu zuen: "Aralar zenbat eta sendoagoa izan, orduan eta atzeraezinagoa izango da bakea herri honetan." Ildo beretik egin zituen adierazpenak Rebeka Uberak: "Aralar da bermea gizarte justuagoa, bidezkoagoa eta ezkertiarragoa eskuratzeko. Baita behin betiko bakea eta normaltasun politikoa lortzeko bidea ere."