Belar gehiago nork moztuko duen apustu egin zuten Iturbek eta Zuazubiskarrek iaz, baina gauza batengatik edo bestearengatik atzeratzen joan dira hitzordua: "Hotelean bertan zeudela hasi ziren berbetan bietako nork moztuko zukeen belar gehiago, eta bazkari on bat dute jokoan. Azkenean, euren arteko apustua lagunen artera zabaldu da, eta goiz pasa ona egiteko aitzakia aproposa bilakatu da", adierazi digu Iñakik.
Sega vs makina
Iturbek eta Zuazubiskarrek ez dute, baina, belarra baldintza berdinetan moztuko. Javierrek sega erabiliko du, eta Josuk sasi-garbitzeko makina: "Hotel ondoan dugun lur-sail bat neurtu dugu, eta ikusi egin beharko da bietako nork amaituko duen lana lehenengo. Gutxi gorabehera ordu erdiko lana izango dute".
Bihar, eguraldiari begira egongo dira: "Eguraldiak apustua baldintza dezake. Euria egiten badu, aterrune baten zain egongo gara apustua egin ahal izateko".