Bildu: "Orain arteko bideari eutsiko diogu"

Bildu koalizioak gaitzetsi egin du Espainiako Auzitegi Gorenak maiatzaren 22ko udal eta foru hauteskundeetarako berak aurkeztutako 254 zerrendak baliogabetu izana, "baina ez diegu utziko nahi dutena egiten, eta herri honetako gehiengo sozial, politiko eta sindikalak ere ez die lagako". Orain arteko bideari eutsiko diola berretsi du Bilduk, eta uste du hori "geldiezina" izango dela. Hona hemen gurean jasotako erreakzioak:

Pello Urizar (EA): "Aralarrekin eta EBrekin lehengo astean elkartu gara, eta egoerari aurre egiteko proposamen batzuk mahai gainean ditugu. EAJrekin ez gara batu oraindik"

Ander Rodriguez (Alternatiba): "Bilduk aurkeztutako zerrendak atzera botatzeak, Sorturekin hasieran egin zuten bezala, Eusko Alkartasuna eta Alternatiba legez kanpo uztea suposatzen du. Auzitegi gorenaren erabakiak zentzugabekeriaren marka guztiak hausten ditu."

Oxel Erostabe (Aralar): "Bakea beharrean, alderdi sozialistak euren interesak aukeratu ditu"

Juan Carlos Garitano (EAJ): "Ea Konstituzionalak bestelako erabakia hartzen duen"

Aritz Arrieta (PSOE): "Gorenaren erabakia errespetatzen dut eta Konstituzionalarena ere errespetatuko dut"

Itziar Lamarain (PP): "Hauteskundeetan Bildu egon edo ez, egoera ez da atsegina izango"

Joxe Etxeberria (Aralar): "Konplikatua ikusten dut etorkizuna"

Xabier Zubizarreta (Ezker abertzalea): "Oztopoak jartzen ari dira, baina alferrik"

• Bildu hauteskundeetatik kanpo utzi du Gorenak, zerrenda guztiak baliogabetuta
• Urkullu: "EAJk lankidetza eta babesa eten du Espainiar Gobernuarekin"
• Markel Olano: Espero dut Konstituzionalak ez duela bidegabekeria hau gauzatuko"