Atseden gutxi egon da asteburuon egindako Arrasateko San Andres auzoko jaietan. Egubakoitzean hasi zen festa auzoko gazteen bazkariarekin. Gauean, La Madriguera, Lord Witch eta Despierta McFly rock doinuak izan ziren nagusi.
Herri bazkarian, bildotsa
Atzo herri bazkaria egin zuten ia ehun lagunek, eta menua ez zen nolanahikoa izan: bildotsa entsaladarekin. Bildotsa gainera, lekuan bertan egin zuten burduntzian.
Eguraldia bera nahiko ondo portatu den arren, atzo arratsaldean Hiruki plazan aurreikusita zegoen umeendako antzerki emanaldia Gudarien plazan egin behar izan zuten. Euria baina, ez zen oztopo izan gauean Emon eta Transit Blues taldeen doinu dantzagarriekin gorputza astintzeko.
Domeka gogorra
Gaurkoa egun betea izan da: Gudarien plaza herri kirolek eta artisauen feriak hartu dute, eta 80 urtetik gorako auzotarrek bazkaria izan dute. Adrian Pinillosek eta Herminia Pugak, bazkariko edadetuenek, opari berezia jaso dute bertan.
Gorriti eta bere animalien, antzerki musikalaren eta umeendako txokolate-janaren ostean, etxafuegoekin bukatu dituzte jaiak.