"Kostatu" egin zaio Bilduko alkategai proposamenari baietz esatea, baina "lanerako gogoarekin eta ilusioarekin" egingo dio aurre erronka berriari.
"Sekulako erronka da niretzat eta kostatu egin zait baietza ematea, baina erronka moduan hartzen dut, ilusioarekin", kontatu dio GOIENAri Bilduko Arrasateko alkategaiak. "Lanerako gogoarekin", datorrela ere esan du.
Sindikalgintzatik politikara
Izan ere, Azkarraga-Urizarrendako estreinaldia izango da politikagintzara salto ematea, sindikalgintzak jardun izan duelako orain arte: "Esperientzia berria da, baina uste dut lagunduko duela orain arte sindikalgintzan ibiltzeak, ze sindikalgintzan gauza bat egiten da: hitz egin, negoziatu eta akordioetara ailegatu, eta uste dut hori baliagarria dela".
Jakinarazi du oraindik ez dakiela Arrasaten noiz egingo duen alderdiak aurkezpen ofiziala eta hauteskunde-programari dagokionez ere, hori lantzen dabiltzala.