Dantzarien agurra, berarendako bereziki egindako bertsoak, bere lanaren errepasoa… egin zioten euskaltzain aramaioarrari. Uribarrenek, berriz, euskara erabili eta zaintzeko arrazoiak azpimarratu zuen Herriko plazan elkartu zirenen aurrean: "Zergatik? Geurea delako, nirea delako. Eta geurea dena maitatu egiten dugulako eta maitatzen badugu erabiliko dugulako. Euskaldun gara euskara erabiltzen dugun neurrian".
Euskaraz jo ta su!
Aizu euskaraz jo ta su! horixe da, berriz, Korrikaren lelo lehiaketara aurkeztu diren 212 leloen artean irabazle aukeratu eta saritu dutena. Leloen sari banaketarekin hasi zuten, justu, Korrikaren atzoko jaialdia. "212 lelo horietatik 40tik gora dabiltza erabiltzen Korrikaren furgonetan!", jakinarazi zuen, gainera, Oskar Elizburuk, Arrasateko eta Gipuzkoako AEKko arduradunak lehiaketako partaideen pozerako.
Lelo onenak
Bost lelo onenak aipatu zituen berak: Aizu, euskaraz jo ta su!, Euskalakari, euskara zure bihotzari; Euskara mihian eta bihotzean; Euskara eta ni lagun bi; Irri euskarari eta korri euskalakari.
Eta hasitako moduan, musikarekin, dantzarekin eta euskararekin eman zioten bukaera borobila Korrikak Arrasate zeharkatu zueneko egunari. Tartean, Txorbela otxoteak kantalditxoa eskaini zuen eta konpartsa txikiak vals erakustaldia.
