Euzko Alderdi Jeltzaleak bi eskaera egin gura izan dizkio Jaurlaritzari mozioaren bitartez: batetik irizpide eta diru-muga horien gaineko araudi berria ken dezala, eta bestetik, onartuko den araudi berria "aldez aurretik EUDEL erakundearen bidez adostua izan dadila".
Pobrezia gehiago, laguntza gutxiago
PSE-EEk eta PPk izan ezik, gainerako alderdi politiko guztiek bat egin zuten EAJren mozioarekin. Labur esanda, euren ustez geroago eta pobrezia handiagoa dagoen honetan, Jaurlaritzaren irizpide aldaketak jende asko babesik gabe utziko duelako.
Jaurlaritzaren ardura
Bereziki nagusien kasua aipatu zuen, esaterako, Eusko Alkartasunak. Alternatibako Ander Rodriguez bozeramaileak azpimarratu zuen geroago eta larrialdi egoeretarako laguntza eskaera gehiago dagoen honetan, Jaurlaritzaren erantzuna dela laguntzok murriztea. Eta Ino Galparsoro alkateak gogora ekarri gura izan zuen halako egoerei aurre egiteko ardura Eusko Jaurlaritzarena dela eta eskaerak hazten eta hazten doazela.
Hilabeteko balorazio eskaera
Sozialistek zein popularrek, berriz, mozio alternatiboa aurkeztu zuten, besteak beste, hilabete bateko epea eskatuaz irizpide aldaketek duten eragina baloratzeko. Aritz Arrieta sozialistak azpimarratu gura izan zuen irizpide aldaketen arrazoi nagusia dela eskaera gehiago dagoenez komeni dela dauden errekurtsoak ondo ordenatzea.
Eta, esaterako, Itziar Lamarain popularrak nabarmendu zuen orain arteko irizpideekin posible zela etxe bat jabetzan eta 40.000 eurora arteko aurrezkiak zituztenek larrialdietarako laguntzak eskuratzea, eta hori ez zutela askok ulertzen.
Kontuak kontu, bozketaren orduan, eta lehen esandako moduan, gehiengoak bat egin zuen jeltzaleen mozioarekin, eta beraz, atzera bota zuten mozio alternatiboa.