Aurtengo lehiaketari dagokionez, LH 6. mailatik hasi eta 23 urte bitarteko gazteek parte hartu dute. 33 bertso-paper, 20 ipuin, 15 poesia lan eta bi komiki aurkeztu dituzte. "Iaz baino gutxiago dira horiek, batez ere, iaz 90 bertso-paper aurkeztu zituztelako eta aurten 33 aurkeztu dituztelako. Eskolen kontua izaten da hori, iaz, esaterako, eskoletan landu zituzten-eta bertso-paperak. Gainontzeko arloetan, parte-hartzea antzerakoa izan da", adierazi du Itxaro Artolak, AEDko dinamizatzaileak.
Hala ere, pozik daude partaidetza horrekin, eta batez ere nabarmendu dute 17 urtetik gorakoen artean iaz baino lan gehiago aurkeztu dituztela.
25. urteurrena
Urrian abiarazi zuen AEDk aurtengo lehiaketa, 24. edizioari dagokiona. Beraz, datorren urtean 25. aldia izango da. "Zerbait berezia egiteko asmoa badugu", esan dute AEDtik. Eta ez da gutxiagorako, izan ere, AED elkarteak 28 ditu eta ia sorreratik hartu zuen Arrasaten literatura lehiaketa antolatzeko lekukoa.
Bestalde, literatura lehiaketak antolatzeko Arizmendi Ikastolaren eta Institutuaren aldetik jasotako laguntza eskertu gura du AEDk.
Finalisten izenak
IPUINA: Maria Oses, Alazne Zuazubiskar, Maialen Gallardo, Garazi Romero eta Maddi Labayen
POESIA: Garazi Romero eta Jon Iraola
KOMIKIA: Aitor Gonzalez eta Aritz Irigoien
BERTSO PAPERAK: Jone Perez Moreno, Marixe Ruiz de Austri, Ane Zuazubiskar Iñarra, Arantzazu Letona Elizburu, Asier Delgado Garcia