Bi konponketa handi egiteko itxi zituzten barruko igerilekuak: igerilekuen sakonera txikitu eta igerilekuak inpermeabilizatu. Baina obrak egiten zebiltzala, ezustean ikusi zuten igerilekuen sabaiaren egoera oso kaskarra zela, arriskutsua. Eta sabaia konpondu behar horrek eragin du igerilekuko obrak orain arte luzatzea.
Kontuak kontu, obra egin ostean, batetik txikitu egin dute igerileku handiaren sakonera: 1,80 m. da orain gehienezko sakonera; erdian 1,60 m. ditu eta izkinetan 1,20 m. Obra egin aurretik, berriz, 1,80-2 m. ingurukoa zen sakonera. Horri esker, besteak beste, metro kubiko ur asko aurreztuko dute, eta, jakina, baita ere, ur hori berotzen ere.
Igerilekuak zabaltzeaz bat, bertako ikastaroak abiaraziko dituzte, maiatzaren 2an. Eta dagoeneko eman daiteke izena horietan parte hartzeko; kiroldegian egin behar da hori.
Udako bonua eta beste
Era berean, bonu-sisteman aldaketak egingo dituzte. Batetik, igerilekuko bonuak egin daitezkeelako. Bestetik, zonalde lehorretik bonu plusera pasatu ahal delako. Eta azkenik, udako bonua ere atera ahal delako. "Bonuen prezioak urtea bukatzeko falta den denboraren arabera aplikatuko ditugu", adierazi dute kiroldegitik.
Xehetasun gehiago, biharko, egubakoitza, Goiena Paperean izango dituzue.