Dena den, biharko puntuak inportanteak dira, ez bakarrik lehen postuan egoteko aukera ematen dutelako; baita hirugarren tokian dagoen taldearekiko aldea handitu egin dezaketelako ere: "Lau puntuko errenta dugu Askartzarekin, eta tarte hori mantendu egin behar dugu. Bihar irabaztea ezinbestekoa da hirugarrenarekin dugun aldea, gutxienez, mantentzeko".
Bigarren postua
Jokalari gutxirekin bete du denboraldia Orgazek, eta nekea nabaritzen hasi dira jokalariak. "Une honetan bi jokalari lesionatuta ditugu: Josu Herrero eta Arkaitz Masip. Hori gutxi balitz, gainerako guztiak oso nekatuta daude. Denboraldia luzea da, eta nabaritzen hasi gara", dio arrasatearren entrenatzaileak.
Dena den, gogotsu daude azken txanpari aurre egiteko. Biharko partiduaren ondoren azken helburua argiago edo ilunago ikusiko dute. "Partiduaren aurretik esango nuke helburua dela bigarren postua mantentzea. Biharko emaitzak esango digu lehen postua eskuratzeko aukerak baditugun. Corazonistak taldeak puntu bat gehiago dauka, baina partidu bat gutxiago jokatu dute", dio.