Funtzionario lanpostuen kasuan, oposizioak deituko dituzte, baina oraindik ez dituzte datarik zehaztu. Izan ere, halako prozesuek pauso burokratiko jakin batzuk eskatzen dituzte, eta horiek bete behar dira azterketak deitu aurretik.
Oinarriak, datorren astean
Gauza bera gertatzen da lanpostuetara aurkezteko bete beharreko baldintza edo oinarriekin. Argitaratu barik daude. Edozelan ere, datorren asterako oinarriok Arrasateko Udalaren webgunean argitaratuko dituzte: arrasate-mondragon.org.
Lehen azterketa, uda aurretik
Bestalde, Udaleko Pertsonal Sailetik aurreratu dute uda aurretik egingo dituztela lanpostu gehienei dagozkien aurrenengo azterketak. Froga teorikoak izango dira. Eta aurreratu dute, baita ere, administrari, ehorzle eta udaltzainen kasuan Arrasateren gaineko gaiak izango direla landu beharko dituztenetako batzuk: Arrasateko historia, kale izendegia eta beste.
Lan-poltsa
Arkitekto teknikoen lan-poltsari dagokionez, berriz, kasu horretan zehaztuta dago izenemate epea noiz zabalduko duten: zapatuan (martxoaren 26an) hasi eta hurrengo egubakoitzera arte, apirilaren 1era arte. Eta lanpostu horri dagozkion oinarriak gaur bertan (martitzena) argitaratuko dituzte Udalaren webgunean. Azterketaren data, berriz, lan-poltsarako izena ematen duen jende kopuruaren arabera finkatuko dute.
BAZekoek azterketa
Bestalde, etzi eguena, dute aurrenengo azterketa Biztanleen Arreta Zerbitzuko lan-poltsa osatzeko izena eman dutenek. 09:00etan dute hitzordua, Kulturateko areto nagusian. 121 lagunek eman du izena, eta aurrenengo froga euskararekin lotutakoa denez, 40 bat lagun daude azterketa horretara deituta.
Martxoaren 30ean, bigarrena
Lan-poltsa horretako bigarren froga, berriz, hurrengo astean egingo dute, martxoaren 30ean. Froga teorikoa izango denez, jendetsuena izango dela aurreikusten dute udal ordezkariek. Hori horrela, Uarkapen egingo dute bigarren azterketa.