Roberto-Zapa eta Emiliren enparantza inskripzioa du Udala plazako plaka horrek; Guardia Zibilak 1978an hil zituen hirurak gogoan. Komando Autonomo Antikapitalistako kideak ziren Roberto eta Zapa, eta poliziarekin izandako tiroketan hil zituzten; eta Emili Larrea arrasatear gaztea ere harrapatu zuen tiroketak.
Biktimen Legea
Bada, hiruren aldeko plaka hori kentzeko errekerimendua egin zuen Ertzaintzak 2009ko irailaren 10ean. Izan ere, badira bi urte, Biktimen Legearen aginduz, biktimendako iraingarri izan daitezkeen pintada eta bestelakoak zaindu, salatu eta kentzeko errekerimenduak egiten dabilela Herrizaingo Saila.
Bi urtean 50 errekerimendu
Arrasateko kasuan, halako 50 errekerimendu jaso ditu bi urtean, bereziki, herriko hainbat tokitan azaldu izan diren pintaden harira. Behin errekerimenduak aurkeztuta, Udalak 24 ordu izaten ditu haiek kentzeko eta kendu ere egiten ditu. Hala ere, errekurtsoak aurkezteko eskubidea ere badu herriko erakunde gorenak, eta Udala plazako plakarekin hala egin zuten. Esandako moduan, Donostiako auzitegiak onartu egin du Udalaren errekurtsoa.