Ezker Abertzalearen jarrera aldaketaren harira, berriz, Carrascoren alabak azpimarratu zuen, baita ere, ez direla gaitzetsi behar bakarrik hemendik aurrerako atentatuak, orain artekoak ere gaitzetsi egin behar dituztela: "Orain bapatean datoz esaten hemendik aurrerako atentatuak gaitzetsi egingo dituztela, baina ez orain artekoak. Akaso ahaztu egin zaie eragindako kalte guztia? Non dago urte hauetako guztiotako gaitzespena?".
Jazarpen eta erailketak
Rafaela Romerok, Gipuzkoako Batzar Nagusietako presidenteak, berriz, Isaias Carrasco hil zuteneko egun "hotz eta euritsua" gogora ekarri du; "une horretan nire mundua aldatu egin zen eta Arrasateko sozialistak ere bai, indartsuago egin ginelako. Francok eta frankistek jazarri eta erail gintuen, diktadurak jazarri eta erail gintuen, eta gero ETAk jazarri eta erail gintuen".
Non dago Pello Urizar?
Sorturen gainean ere egin du berba, esanez, "sinistuko diogu Isaiasen hilketa gaitzesten badu". Besteak beste Pello Urizarren, EAko idazkari nagusiaren presentzia exijitu du: "Aurrekoan manifestatu zen Puelles hil zutenak atxilotu zituztenean. Non dago orain?".
Eta bestelakoean artean, salatu du Udalak ez duela onartu San Andresko Navas de Tolosa kaleari Isaias Carrasco Miguel izena ipintzeko eskaera.
Sozialisten ordezkariak
Lore eskaintzan parte hartu dutenen artean, izan dira, argazkien ordenaren arabera: Isaias Carrascoren ama, Sandra Carrasco alaba, Adei Carrasco semea, Rodolfo Ares Barne Sailburua eta Jesus Egiguren sozialisten presidentea. Eta taula-gainean, besteak beste, izan dira: Rafaela Romero, Blanca Roncal, Legebiltzarreko presidente-ordea, Miguel Buen, diputatu nagusi izateko hautagaia eta Jose Antonio Pastor Legebiltzarreko PSE-EEko bozeramailea.
