Astelehenean, otsailak 28, beteko da urtebete Joseba Iglesias gazte arrasatearra Udalatxen hil zela. Urteurrena gogoan, 80 bat arrasatear Besaidera igo dira gaur goizean; haur, gazte zein heldu. Besaiden Iglesiasen omenez haritz bat landatu dute, gaztetxetik hartutako zuhaitza, hain zuzen. Izan ere, gaztetxea zen Iglesiasen txoko kuttunetako bat. Ekitaldi xumea izan da, inprobisatua hein handi baten, ez zen-eta asmoa beste munduko ekitaldirik egitea.
Haritza landatu ostean, hamaiketakoa egitera joan dira Udalako elkarte gastronomikora. Mokadutxoa egin dute bertan, eta salda berorik ez da falta izan. Egunarekin amaitzeko, Iglesiasen gertukoenak bazkaria egingo dute gero.
Bestalde, astelehenean, otsailak 28, beste ekitalditxo bat egingo dute gaztetxean, Iglesias hil zela urtebete beteko den egunean. Haren omenez egindako muralean lore eskaintza egingo dute eta bi lagunek aurreskua dantzatuko dute, 19:00etan.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
