Lehen zatian barkatutakoak garesti ordaindu zituen Mondrak bigarren zatian (0-2)

Futbolaren legeetako bat da: barkatzen duenak ordaindu egiten du gero. Legea beste behin bete zen atzo Mojategin; Mondrak lehen zatian hainbat aukera garbi izan zituen baina zerrajeroak ez ziren fin ibili ate aurrean. Aurrelarien akatsen edo Berioko atezainaren lan onaren ondorioz atsedenaldira golik gabeko berdinketarekin heldu ziren. Bigarren zatia hasi eta berehala aukera garbi bat izan zuen Xabi Pavonek baina ez zuen asmatu. Bada, gutxira heldu zen kanpokoen gola, eta hortik aurrera Mondrak ez zuen erreakziorako gaitasunik erakutsi. Amaieran: 0-2 galdu, etxean, eta aurkari zuzena den Berioren kontra: Mondrako jokalariek arrazoi nahikoa zuten aldageletara burumakur joateko.