Kopan B mailan diharduten taldeak euren artean lehiatzen dira, hiru taldez osatutako bi multzotan. Sei talde horietatik bi pasako dira hurrengo kanporaketara, A mailako taldeen aurka lehiatzeko. Aukera erakargarria da goi mailako jokalariekin lehiatzeko baina Durangok Kopa "lasai" hartu du aurten.
Kopan egotea bera sari bat da, Aratz Gallastegi Durangoko entrenatzailearen ustez: "Kopa oso lasai hartu dugu, mailaz jaisteko promozioan ez sartu izanaren sari modura. Zelaian probak egiteko aukera ematen digu eta asmo horrekin joango gara Mojategira".
Aurrera egitea, zaila
Kopan aurrera egitea zaila izango da, izan ere,lehen partidua galdu egin zuten Oviedoren aurka (44-26). Beraz, Durangok Hernaniren aurka irabazi beharko du zapatuan eta gero Oviedo eta Hernaniren arteko emaitza itxaron. Koparen osteko lana da garrantzitsuena, Gallastegiren arabera: "Taldeak funtzionatzen jarraitu behar du. Kopatik kanpo geratzen bagara, arlo fisikoa landu beharko dugu, hau da, gimnasioan ordu asko egin behar ditugu. Pisua hartu behar dugu eta giharrak indartu. Jokalariz jokalari neurtuta, alde handia dago; arinegiak gara".