Errepideko zoladura zaharra kendu, eta gero hasiko dira zoladura berria botatzen; bien bitartean, posible da, txandaka, Otalora kaletik automobilez pasatzea. Hori bai, argazkiak erakusten duen moduan, tarteka sortu izan dira auto-ilarak, txikiak izan arren, zirkulazioa bideratzen dabiltzan udaltzainen etsipenerako: “Nahiko trankil gabiltza, baina hori bai, gidari askok eragozpenak besterik ez dituzte eragiten”, kontatu dute. Beraz, eta Udaltzaingoaren gomendioari kasu eginez, zuzenena da egunotan bide alternatiboak erabiltzea. Bestela, Maalara bertara iritsi ostean, Garibai etorbidetik dabiltza une honetan zirkulazioa desbideratzen.
Autoak kendu, aparkalekuetatik
Datozen egunotan, Otalora kalean barrena segi egingo dute asfalto lanek. Bihar, San Frantziskoko biribilgunetik Monterronerainoko zatian egingo dituzte lanak. Horren harira, komeni da datozen orduotan erretiratzea albo bietan aparkatuta dauden automobilak. Seinaleak ipinita daude.
Monterron-Muxibar
Eta lanak bukatzeko, etzi, eguena, Monterronetik Muxibarrera arteko zatian bideko zuloak kenduko dituzte, Otalora kalean eta Zarugalde kalean, bietan.